DC SAMIZI ATOA RAI KWA VIONGOZI WA HALMASHAURI KUSHIRIKI KATIKA MRADI UNAOTEKELEZWA NA FEDHA ZA UVIKO-19

Posted on: November 3rd, 2021

Viongozi wa Halmashauri ya Wilaya ya Kwimba wameaswa kushiriki katika ujenzi wa madarasa, mradi unaotekelezwa kwa fedha za UVIKO-19 ambapo madarasa 109 yanajengwa katika shule za Sekondari.

Rai hiyo imetolewa na Mkuu wa Wilaya ya Kwimba Mhe. Johari Mussa Samizi leo tarehe 03/11/2021  katika baraza la Madiwani. Mheshimiwa Samizi  amesisitiza kuwa Madiwani na viongozi wengine wote  wanapaswa kumshukuru Mheshimiwa Rais wa Jamuhuri ya Muungano wa Tanzania Mama Samia Suluhu Hassan kwa kuona umuhimu wa kuleta fedha nyingi ili kujenga madarasa ambayo yakikamilika yatapunguza au kuondoa kabisa changamoto ya upungufu wa madarasa katika baadhi ya Shule.

" tunachotakiwa kufanya ni kumshukuru Mheshimiwa Rais Samia Suluhu Hassan kwa kutuletea fedha za ujenzi wa madarasa kitu ambacho hakijawahi kutokea kwa Serikali kupeleka fedha nyingi Nchi nzima kwa wakati mmoja lakini jambo hili limewezekana katika Awamu hii ya sita, hivyo niwaombe tushiriki kusimamia na kuhakikisha miradi yote inakamilika kwa wakati". amesema Samizi

Katika Baraza hilo Waheshimiwa Madiwani wameweza kueleza jinsi  tatizo la upungufu wa madarasa linavyoongezeka siku kwa siku baada ya mwitikio  wa wanafunzi kujiunga na Elimu ya Sekondari kuwa mkubwa kutokana na Sera ya Elimu bila malipo.

Naye Mkurugenzi Mtendaji wa Halmashauri ya Wilaya ya Kwimba Bi.Happiness Msanga amesema Serikali haijaishia kwenye ujenzi wa madarasa tu bali imelata milioni 500 kwaajili ya ujenzi wa Vituo vya Afya viwili yaani Kituo cha Afya Bungulwa  ambacho ujenzi  unaendelea na Kituo cha Afya Kikubiji.