FEDHA ZA MIRADI YA MAENDELEO NITAZIFUATILIA

Posted on: December 18th, 2024

Mkuu wa Wilaya ya Kwimba Mhe.Ng'wilabuzu Ludigija  amewataka wakuu wa taasisi zote zilizopo Wilayani Kwimba kuhakikisha wanassimamia utekelezaji wa miradi ya maendeleo na kuhakikisha fedha zote za miradi zinatekeleza miradi kwa wakati kabla ya mwaka wa fedha kuisha

" siyo vizuri fedha zinakuja kutoka Serikali kuu harafu zinakaa muda mrefu bila kutekeleza miradi iliyokusudiwa, kwahiyo fedha za miradi ya maendeleo nitazifuatilia kwa karibu sana"  amesema Ludigija

Mkuu wa Wilaya ameyasema haya kwenye kikao cha kamati ya ushauri ya Wilaya kilichofanyika leo Desemba 18,2024 katika ukumbi wa Halmashauri ambapo taarifa za taasisi za RUWASA,TARURA,Halmashauri na taarifa nyingine zimewasilishwa kwenye kikao hicho.

Aidha Mkuu wa Wilaya ameitaka taasisi ya RUWASA  kuhakikisha wanamsimamia mkandarasi anayetekeleza mradi wa maji wa Shighumlo- Nyamilama ili akamilishe mradi huo huku akisisitiza mtandao wa mradi huo ukamilike haraka ili wananchi  wapate huduma pamoja na shule ya sekondari Nyamilama  ipate maji ya uhakika

" tunatarajia kuanzisha kidato cha tano na sita hapo shule ya Nyamilama  kwahiyo maji yanatakiwa yapatikane ya uhakika ili wanafunza wapate maji ya kutosha" Ludigija

Mheshimiwa Ludigija  ametumia kikao hicho kutoa maelekezo kwa watumishi wote wa Idara ta Afya kuhakikisha wanatekeleza majukumu yao ipasanyo, pia amewataka watumishi wote wasiotimiza wajibu wao wachukuliwe hatua za kisheria ili iwe fundisho kwa watumishi wengine.

Katika kikao hicho ameshiriki  Mwenyekiti wa Halmashauri Mhe. Thereza Lusangija  ambaye amesisitiza watumishi kufanya kazi kwa kuzingatia taratibu, kanuni na sheria zinazoongoza utumishi wa umma.

Naye Mkurugenzi wa Halmashauri ya Wilaya ya Kwimba Dkt.Amon Mkoga  ametumia wasaa huo kuwasisitiza  watumishi wa idara ya afya kuhakikisha wanatimiza wajibu wao na kuacha kufanya kazi kwa mazoea.