KWIMBA YAPONGEZWA KWA KUONGOZA MATOKEO KIDATO CHA SITA MKOA WA MWANZA

Posted on: August 13th, 2024

Mkuu wa Wilaya ya Kwimba Mhe Ng'wilabuzu Ludigija  amewapongeza viongozi na wasimamizi wa elimu wa Halmashauri ya Kwimba  kwa kupandisha ufaulu kwa kiwango kikubwa.

Pongezi hizo zimetolewa leo Agosti 13,2024 kwenye baraza la Madiwani robo ya nne  ya mwaka wa fedha 2023/24 ambapo taarifa ya matokeo ya kidato cha sita imeonyesha kuwa Shule ya kwanza, ya pili na ya tatu kimkoa zimetoka Wilaya ya Kwimba huku Shule ya Sekondari Tallo ikiwa nafasi ya saba Kitaifa kati ya Shule zaidi ya 929

" kazi iliyofanyika ni kubwa sana niwapongeze viongozi wote kwa usimamizi pia niwapongeze walimu kwa kutimiza wajibu wao, walimu hao waliosababisha kwimba itambulike wapewe motisha ili waendelee kufanya vizuri zaidi" amesema Ludigija

Mheshimiwa  Ludigija  ametumia wasaa huo kuwataka madiwani kwenda kusimamia elimu huku wakisisitizwa kushirikiana na Walimu kuzuia utoro wa wanafunzi ili kuendelaa kupandisha ufaulu.Pia  amewataka waheshimiwa Madiwani kwenda kuhamasisha wananchi  kujiandikisha na kuboresha taarifa zao kwenye daftari la mpiga kura

Naye Katibu wa Chama Cha Mapinduzi Wilaya ya Kwimba Ndugu Aziza Isimbula ametumia wasaa huo kuwashauri Madiwani kwenda kufanya mikutano ya kuwaeleza wananchi  miradi inayotekelezwa na Serikali  pia ameipongeza Halmashauri  kwa kuweza kukusanya mapato ya ndani zaidi ya asilimia 100 ya lengo hali iliyopelekea fedha nyingi kutekeleza miradi ya maendeleo.

Akiwasilisha taarifa ya utekelezaji ya robo mwaka Bi. Happiness Msanga  Mkurugenzi Mtendaji wa Halmashauri  ameishukuru Serikali ya awamu ya sita kwa kuendelea kuboresha miundombinu ya Elimu,  hali inayoongeza hamasa ya wanafunzi kupenda masomo na kufanya vizuri kwenye mitihani.

Madiwani walioshiriki Mkutano huo wamempongeza Mkurugenzi  na wataalamu wote wanaosimamia elimu kwa kupandisha ufaulu " shule ni zilezile na walimu niwalewale lakini ni miaka mitatu mfululizo matokeo yanakuwa mazuri sana kwakweli tunampongeza Mkurugenzi  kwa usimamizi mzuri, tuwaombe walimu na wataalamu wote  wasirudi nyuma tena wasonge mbele zaidi matokeo yajayo tuwe wakwanza kitaifa" amesema Mhe. Gervas Kitwala