MADIWANI WAGEUKA MBOGO WATAKA BARABARA ZIKARABATIWE

Posted on: November 13th, 2024

Halmashauri ya Wilaya ya Kwimba imefanya  Mkutano wa baraza la Madiwani robo ya Kwanza ya mwaka wa fedha 2024/25  siku ya kwanza jana Novemba  12,2024 ambapo taarifa za Kata na  taarifa za taasisi zilipo Wilayani Kwimba zimewasilishwa huku waheshimiwa madiwani wakimtaka Meneja wa TARURA kuhakikisha  barabara zilizo  haribiwa na mvua zinakarabatiwa 

" barabara  zimeharibika sana na mvua ndio zimeanza saizi na kuna maeneo mengine makalavati yameharibi na yanasababisha ajari  kwa wananchi hizi barabara zikarabatiwe" amesema Mhe. Shinje Deusi

Waheshimiwa madiwani wamemtaka meneja wa Tanesco kuhakikisha umeme unafika kwenye taasisi zote za Umma huku msisitizo ukiwa  umeme wa kila kitongoji uzingatie kila kata 

" tulipata taarifa kuwa umeme kila kitongoji Wilaya ya Kwimba tulipata vitongoji 30 kwahiyo tunaomba mgawanyo uzingatie kila jimbo na kila kata" amesema Mhe. Peter Msalaba

Aidha wameshauri miradi ya maji ambayo imetekelezwa kwa muda mrefu na haijakamilika wakandarasi wanaotekeleza miradi hiyo wachukuliwe hatua

Katika kikao hicho Mganga Mkuu wa Wilaya Dkt.Zuber  Mzige ametoa taarifa ya hari ya kipindupindu huku akisisitiza ushirikiano kwenye kutoa elimu ya kujikinga na ugonjwa wa huo

" kipindupindu kinasababishwa na uchafu, hivyo tunawaomba mnapokuwa na mikutano au mikusanyiko waambieni wananchi umuhimu wa kuzingatia usafi,kuchemsha maji ya kunywa na kunawa,kujenga vyoo na tutaanza kukagua vyoo tutakayemkuta hana choo tutamtoza faini" amesema Mzige

Naye Mkurugenzi Mtendaji wa Halmashauri ya Wilaya ya Kwimba  Dkt Amon Mkoga amesisitiza kuwa elimu iendelee kutolewa kwa wananchi ili kuondoa  maambukizi ya kipindupindu.

Akiahirisha Mkutano huo Mwenyekiti wa Halmashauri  Mhe. Thereza Lusangija  amewataka wajumbe wa mkutano huo  kwenda kufanyia kazi maelekezo yote yaliyotolewa.