WANANCHI WA KWIMBA WAHAMASISHWA KUCHAGUA VIONGOZI BORA WA SERIKALI ZA MITAA

Posted on: November 23rd, 2024

 Mkuu wa Wilaya ya Kwimba Mhe. Ng'wilabuzu Ludigija  amewahamasisha Wananchi kujitokeza kupiga kura siku ya uchaguzi wa Serikali za mitaa  utakaofanyika Novemba 27,2024.

Hamasa hiyo imefanyika leo  tarehe 23,Novemba ,2024 kwenye viwanja vya Kwideco ambapo bonanza la michezo mbalimbali limefanyika.

" wananchi wote tujitokeze kupiga kura siku ya uchaguzi ili tukawachague viongozi tunaowataka ambao watahamasisha maendeleo katika maeneo yetu" amesema Ludigija

Naye msimamizi wa Uchaguzi  Dkt Amon Mkoga ametumia wasaa huo kuwahamasisha wananchi wote waliojiandikisha wajitokeze kupiga kura

Amesisitiza kuwa elimu ya mpiga kura imetolewa kwa wananchi kupitia njia mbalimbali  ikiwemo, vyombo vya habari, mikutano, mitandao ya kijamii, vipeperushi na matangazo.

" tunawahamasisha kila mwananchi aliyejiandikisha awe tayari kwenda kupiga kura, elimu imetolewa hivyo tunaamini wananchi watapiga kura"  amesema Mkoga

Wananchi  walioshiriki bonanza hilo wameeleza utayari wao wa kushiriki uchaguzi huo " lazima nikapige kura siku hiyo maana natamani kiongozi ninaye mtaka ndio awe mshindi" amesema Justina Nyanda

Katika bonanza hilo hamasa imetolewa kupitia mchezo wa mpira wa miguu ambapo timu iliyoibuka mshindi ( Bodaboda FC )  imejinyakulia Mbuzi na timu iliyoshika nafasi ya pili ( Modo FC ) imepata mbuzi, na washindi wa michezo mingine wamepata zawadi mbalimbali.