WANANCHI WASHAURIWA KUTUNZA CHAKULA

Posted on: April 14th, 2025

Wananchi wameshauriwa kutunza vyakula kwaajili ya matumizi ya familia zao ili kujiepusha na madhara ya njaa yanayoweza kujitokeza kutokana na wananchi hao kuuza mazao mengi ukizingatia na uzalishaji haukuwa mkubwa kutokana na hali ya hewa.

Ushauri huu umetolewa na Mkuu wa Wilaya ya Kwimba Mhe Ng'wilabuzu Ludigija  katika kikao cha tathmini ya lishe  kilichofanyika leo April 14,2025 ambapo amewaelekeza watendaji wa kata kwenda kuwahamasisha wananchi  kuacha kuuza mazao yote waliyovuna badala yake watunze akiba kwaajili ya matumizi ya familia zao

"Kawambieni wananchi wasiuze vyakula vyote watunze akiba, Ofisi ya Mkuu wa Wilaya haina shamba harafu ni aibu kwa Mwananchi wa Kwimba kulia njaa wakati chakula kimepatikana hatakama hali ya hewa haikuwa nzuri sana lakini bado chakula kilichopatikana kisiuzwe chote harafu wakaanza kuhangaika" amesema Ludigija

Katika kikao hicho Mkuu wa Wilaya  amewasisitiza watendaji kuendelea kusimamia upatikanaji wa chakula shuleni ili wanafunzi wote wapate chakula " tunataka wanafunzi wote wapate chakula shuleni  ili tutengeneze kizazi chenye nguvu, na uwezo wa kufikiri hatutaki kuwa na watoto wenye utapuamlo" Ludigija 

Aidha amemtaka Afisa elimu Sekondari kuongeza usimamizi katika Shule ya Sekondari Nyamilama  ambayo imeonekana kuwa na wanafunzi wengi,  ili kuhakikisha wanafunzi wanapata lishe bora na wanakaa katika mazingira salama na wezeshi kujifunza

Akiwasilisha taarifa za Lishe Mratibu wa Lishe Bi. Emma Kalolo  amesema Halmashauri inaendelea kutoa elimu kwa wananchi juu ya umuhimu wa kuwalisha watoto chakula  kinachozingatia makundi yote ya vyakula ili kuondoa tatizo la utapiamlo na kuwahimiza wanawake wajawazito kuhudhuria kliniki  kwa wakati.