WATENDAJI WATAKIWA KUHAMASISHA LISHE BORA KWA WANANCHI

Posted on: October 23rd, 2024

Mkuu wa Wilaya ya Kwimba Mhe. Ng'wilabuzu Ludigija  amewataka watendaji wa Kata kuwahamasisha wananchi  kuzingatia ulaji bora wa vyakula vyenye lishe hasa wanawake wajawazito na watoto.

Ameyasema hayo kwenye kikao cha tathmini ya lishe kilichofanyika leo 23 Oktoba  2024 ambapo tathmini imeonyesha kuwa baadhi ya kata bado ina  watoto wenye utapiamlo

" watendaji nendeni mkawahamasishe wananchi  kula chakula kinachozingatia makundi yote ya vyakula, waelekezi wananchi kutumia vyakula vinavyopatikana katika maeneo yao" Ludigija 

Aidha Mkuu huyo amesisitiza wanawake wajawazito washauriwe kuhudhulia kliniki na  wasisitizwe kuzingatia maelekezo yote wanayopewa kliniki ikiwa ni pamoja na kumeza dawa za kuongeza damu ili kuepuka kupata watoto wenye magonjwa mbalimbali kama kichwa kikubwa, mdomo wazi na magonjwa mengine.

Akiwasilisha taarifa ya lishe ya robo ya kwanza ya mwaka wa fedha 2024/25 Ema Kalolo Afisa Lishe amesema Shule zote zinatoa chakula kwa wanafunzi japo siyo wanafunzi wote wanaopata chakula kwani wengine wazazi wao hawajachangia vyakula kwaajili ya watoto wao

" niwaombe watendaji, walimu na maafisa Elimu Kata muendelee kuwahamasisha wananchi kuchangia vyakula kwaajili ya watoto shuleni, maana watoto ambao hawapati chakula wanapata wakati  mgumu kushinda na njaa shuleni"

Naye Mkurugenzi Mtendaji wa Halmashauri Dkt.Amon Mkoga  ametumia wasaa huo kuhamasisha elimu iendelee kutolewa ya lishe kwa wananchi  hasa wajawazito, pia amewataka watendaji kusimamia miradi inayotekelezwa kwenye maeneo yao na kuhakikisha miradi hiyo inakamilika kwa wakati.