DC LUDIGIJA AFUNGUA MAFUNZO YA MAADILI KWA VIONGOZI NA WATUMISHI WA UMMA

Posted on: June 20th, 2023

Mkuu wa Wilaya ya Kwimba Mheshimiwa Ng'wilabuzu Ludigija amewataka watumishi na waheshimiwa Madiwani kutumia mafunzo ya maadili kuongeza uadilifu. Ameyasema hayo leo Juni 20,2023  wakati akifungua mafunzo ya maadili kwa viongozi na watumishi wa umma yanayofanyika katika ukumbi wa Halmashauri ya Wilaya ya Kwimba.

"mtumie nafasi hii ya mafunzo kuuliza maswali yatakayowasaidia kujijenga,lakini mtambue kuwa uadilifu na utumishi uliotukuka ni vitu ambayo havitenganishwi kwahiyo naamini mkipata haya mafunzo yawasaidie kufanya kazi kwa uadilifu na kuzingatia sheria za utumishi" Ludigija

Mkuu huyo amesisitiza Elimu hiyo itumike kuboresha mambo mbalimbali katika Halmashauri  na isaidie kila mtumishi kujua mipaka yake katika utumishi. Aidha Mheshimiwa Ng'wilabuzu amewapongeza waandaaji wa mafunzo hayo kwani yataongeza Chachu ya uwajibikaji.

Wakiwasilisha mada mbalimbali wawezeshaji( Innocent Shetui,na Christian Kapele)  kutoka Sekretarieti ya Maadili ya utumishi wamesisitiza viongozi na watumishi kujiepusha na mgongano wa maslahi, kuzingatia sheria ya maadili, wajibu wa viongozi, kukuza na kuzingatia maadili mahali pa kazi na katika Jamii.