DC SAMIZI AKEMEA WANANCHI WANAOVAMIA MAENEO YA TAASISI

Posted on: November 14th, 2022

Mkuu wa Wilaya ya Kwimba Mheshimiwa Johari Samizi amekemea tabia ya Wananchi kuvamia maeneo shule na kufanya shughuli za kilimo. Ameyàsema hayo leo tarehe 14, Novemba 2022 katika mkutano na Wananchi wa kijiji cha Ligembe.

"Mahakama ilishatoa maamuzi kuwa eneo ni mali ya Shule sasa wewe raia unayeona hukuridhika na maamuzi hayo rudi mahakamani lakini siyo kuwatisha walimu kwa mapanga, fimbo na siraha nyingine, nakemea tabia hiyo na atakayekamatwa anafanya vurugi kwenye eneo la shule hatua za kisheria zitachukuliwa" amesema Samizi

Mkuu huyo ameyasema hayo baada ya mgogoro wa ardhi kuibuka kati ya wanafamilia wa Busanda na Shule ya Ligembe,  ambapo Mahakama ilishatoa hukumu iliyoelekeza kuwa eneo ni mali ya shule lakini familia hiyo inaonekana kutokubaliana na uamuzi wa mahakama.

Aidha Mkuu wa Wilaya amewataka wananchi kutojichukulia sheria mkononi, na kufanya fujo na kuhatarisha usalama. Katika Mkutano huo wananchi wa kijiji cha  Ligembe wameitaka familia ya Busanda  kuacha kuvuruga amani katika kijiji hicho kwani wanaamini mgogoro uliisha baada ya mahakama  kutoa hukumu

"mgogoro huu sisi tulishakaa tukaumaliza tumeshangaa kuona  leo tunaitwa tena  kuambiwa mgogoro ambao mahakama ilishaumaliza, sisi hatutaki kusikia,  huu mgogoro haupo tunachotaka shule yetu isiingiliwe na mtu" amesema Isaya Yona mwananchi

Akitoa ufafanuzi juu ya hukumu iliyotolewa na mahakama Afisa Ardhi ( W) Ndugu Wicklif Benda amesema mahakama ilijiridhisha kuwa eneo ni mali ya shule baada ya kufatilia usajili wa shule ulioanza zaidi ya miaka 40 iliyopita na vigezo vingine vilivyobainisha kuwa eneo ni mali ya shule.