DC SAMIZI ATOA ELIMU YA CHANJO YA UVIKO-19 KWA WANANCHI

Posted on: October 5th, 2021

Mkuu wa Wilaya ya Kwimba Mhe. Johari Samizi akiwa ameambatana na kamati ya hamasa ya utoaji wa elimu ya  Chanjo ya UVIKO-19 ya Mkoa na Wilaya  wametoa elimu ya umuhimu wa chanjo  hiyo  kwa wananchi wa Kata ya Mantare kijiji cha Mwampulu na Mwanekeyi, Kata ya Bungulwa na Walla ambapo baada ya Wananchi kupata elimu hiyo watu 30 wamejitokeza kupata chanjo ya virusi vya corona.Elimu hiyo imetolewa leo tarehe 05,Oktoba 2021.

Akiongea na Wananchi Mkuu wa Wilaya amesema chanjo ni salama hivyo wasiogope kuchanjwa kwani kila Mwananchi anapaswa kulinda Afya yake.

 "kufa kupo ila hatupaswi kufa kizembe  hivyo ni muhimu kuchanja ili kujihakikishia usalama wa Afya" amesema Samizi

Aidha akiongea na vijana waendesha Pikipiki amewashauri kutosikiliza maneno yasiyo sahihi yanayowafanya wahofie usalama wa Afya zao baada ya kuchanja.Amewahakikishia kuwa chanjo ni salama na amewashauri wachanje kwa kuwa kazi yao inawafanya kukutana na watu wengi wanaotoka maeneo tofauti hivyo kuna uwezekano mkubwa wa  kupata maambukizi.

Baada ya kuchanja  Wananchi hao  wamepatiwa kadi zinazoonyesha kuwa wamejikinga na virusi vya corona.