Kaya 9263 za nufaika na Mradi wa TASAF III

Posted on: May 30th, 2017

Halmashauri ya Wilaya ya Kwimba imetoa Jumla ya shilling 332,564,000/= Kwa wanufaika wa Mradi wa TASAF III. Lengo la mpango huo ni kuzisaidia Kaya Maskini 9263 kupata mahitaji ya msingi  kama vile huduma za Elimu,Afya na kuongeza kipato katika familia.

Mratibu wa TASAF Wilaya ya Kwimba Ndg Barnabas Yawanga amewaomba wanufaika wa fedha za TASAF  kuwa na  matumizi sahihi .

 “Hakikisheni Fedha mnazopata mnazitumia vizuri kwa ajili ya  kumudu mahitaji ya msingi kama vile kuwapeleka watoto shule,kukata bima ya Afya,kumudu gharama za dharura katika familia, kuwekeza katika shughuli za uzalishaji  na kujiongezea kipato na hatimaye kuondokana na  umaskini”                                                                                  

Kwa upande wake  Mwezeshaji wa TASAF Ndg Matiku Magesa  amewashauri walengwa wa Kata ya Nyambiti kuwa fedha wanayoipata wahakikishe wananunua chakula ili kupambana na makali ya bei ya chakula inayozidi kupanda  wilayani kwimba.

Akitoa maoni yake  Mjumbe wa Serikali ya kijiji cha Nyambiti Ndg Richard Masele ameiomba Selikari iongeze kiwango cha fedha kwa Wanufaika wa Mradi kwani fedha wanayoipata ni kidogo ukilinganisha na hali halisi ya maisha.

Aidha Bibi Mariam Deus ambaye ni mnufaika wa kaya masikini  katika kijiji cha Nyambiti amesema Fedha za Mradi wa TASAF zimemsaidia  kujenga nyumba ya matofali na kuezeka kwa  bati.

Akionyesha msisitizo namna Mradi unavyomnufaisha, Mzee William Musa amesema  fedha anazozipata humsaidia kununua chakula pamoja na mahitaji madogomadogo ya familia anayoiongoza.

Mradi wa TASAF  awamu ya III  umereta manufaa makubwa kwa wananchi waliokuwa na hali duni ya maisha na hivyo kuchochochea maendeleo endelevu miongoni mwa kaya hizo pamoja na jamii ambayo siyo wanufaika wa Mradi.Wananchi wa Kwimba wanatoa pongezi na shukrani nyingi kwa Serikali kwa namna inavyowahudumia.

Imetolewa na:

Kitengo cha Habari na Uhusiano

Halmashauri ya Wilaya ya Kwimba

30 Mei 2017.