MKURUGENZI AKABIDHIWA SIMU 119 NA TAASIS YA BENJAMIN MKAPA

Posted on: May 26th, 2022

Mkurugenzi Mtendaji wa Halmashauri ya Wilaya ya Kwimba Bi. Happiness Msanga leo tarehe 26 Mei 2022 amekabidhiwa simu za Mkononi ( Smartphone) 119 na Taasisi ya Benjamini William Mkapa kwaajili ya kuwarahisishia kazi wahudumu wa Afya ngazi ya jamii.

Akikabidhi Simu hizo Bi. Scholastica Komba Afisa kutoka Taasisi hiyo amesema " tumeleta vitendea kazi kwa wahudumu wa Afya ngazi ya jamii ili tuweze kurahisisha upatikanaji wa taarifa sahihi za Mama na mtoto, UVOKO-19, Lishe, uhamasishaji wa chanjo zote na Malaria"

Afisa huyo ameongeza kuwa simu hizo zina mifumo inayokuwa na madodoso yatakayosaidia kujaza taarifa za mama wajawazito, watoto, Lishe, Malaria hivyo kupitia fomu hizo taarifa zitapatikana kwa urahisi na kwa wakati .

Taasisi ya Benjamini Mkapa imetoa simu hizo kupitia mradi wa kuimarisha mifumo stahimilivuna na  endelevu unaofadhiliwa na mfuko wa Dunia ( Global Fund) wenye lengo la kuongeza ufanisi katika utoaji wa huduma za Afya hususani huduma za UKIMWI, Kifua kikuu, Malaria na kuhuisha mapambano dhidi ya UVIKO-19 kwa kushirikiana na Serikali za mitaa.

Mkurugenzi ameishukuru Taasisi hiyo kwa kuona umuhimu wa kuleta vitendea kazi kwa wahudumu na amewaomba waendelee kuleta vifaa vingi zaidi ili kuendelea boresha huduma zinazotolewa na wahudumu wa Afya ngazi ya jamii.