Mkurugenzi Mtendaji wa Halmashauri ya Wilaya ya Kwimba Afungua Mafunzo ya Mfumo wa FFARS

Posted on: June 13th, 2017

Mkurugenzi wa Halmashauri ya Wilaya ya Kwimba Bibi Pendo A. Malabeja  amefungua mafunzo ya  mfumo wa Uhasibu na utoaji taarifa za fedha kwa ngazi ya kituo cha kutolea huduma   ujulikanao kwa Kiingereza kama Facility Financing Accounting and Reporting System (FFARS) kwa Mhasibu wa Hospital ya Wilaya, Wakuu  wa Vituo vya Afya na Waratibu Elimu Kata yaliyotolewa na OR-TAMISEMI kwa kushirikiana na Mradi wa Uimarishaji wa Mifumo ya Sekta za Umma yaani Public Sector System Strengthening   (PS3) katika Ukumbi wa Chama cha Walimu (CWT) Kwimba tarehe 12/06/2017.

Akifungua mafunzo hayo; Bibi Pendo A. Malabeja amewaomba washiriki wa Mafunzo  kuzingatia  mafunzo hayo kwa umakini wa hali ya juu kwani  watakwenda kufundisha watumishi wa Mamlaka za Serikari za Mitaa kwenye vituo vya kutolea  huduma (Zahanati,Shule za Msingi na Sekondari)

Kwa upande wake mshauri wa masuala ya fedha (PS3) Bwana Martin Lawi amewataka washiriki wa mafunzo wawe kitovu cha mabadiliko kwa ajili ya mifumo na kuhakikisha taarifa za fedha zinaandaliwa kwa usahihi na zinatumwa kwa wakati makao makuu ya wilaya kila mwezi na kila robo ya mwaka.

Aidha mshiriki wa Mafunzo Bwana Jackson John Stephano ambaye ni Mratibu Elimu Kata ya Ngudu amesema mafunzo yamewajengea uwezo wa kutosha kwa upande wa “manual”  hivyo basi wanahitaji mafunzo mengine kwa upande wa Kielektroniki kwa ajili ya ufanisi zaidi.

Washiriki wa Mafunzo ya mfumo wa Uhasibu na utoaji taarifa za fedha kwa ngazi ya kituo cha kutolea huduma wakisikiliza kwa makini  Mada zinazofundishwa na wakufunzi.

Kwa kuhitimisha mafunzo hayo Mratibu wa PS3 Halmashauri ya wilaya ya kwimba Bwana Yohana Mhandikila ametoa shukrani zake kwa  watu wa Marekani kupitia Shirika la Maendeleo ya Kimataifa la Marekani (USAID), pamoja na Mradi wa PS3, na wadau wote waliohakikisha mfumo huu unakuwepo, ambao ni: Ofisi ya Rais, Tawala za Mikoa na Serikali za Mitaa (OR-TAMISEMI), Wizara ya Fedha na Mipango; Wizara ya Elimu, Sayansi, Teknolojia na Ufundi; na Wizara ya Afya, Maendeleo ya Jamii, Jinsia, Wazee na Watoto

Halmashauri ya wilaya ya Kwimba ina jumla ya vituo vya afya vitano (05), Zahanati Aarobaini na nne (44) ,Hospitali moja (01), Shule za msingi  mia moja hamsini na moja (151) na Sekondari  thelathini na tano (35)  Mafunzo haya yatasaidia kuhakikisha watoa huduma katika vituo wanapata ujuzi wa kutosha katika usimamizi wa fedha na kutoa huduma bora kwa wananchi wote na jamii zenye uhitaji.

Imetolewa na:

Kitengo cha Habari na uhusiano

Halmashauri ya Wilaya ya Kwimba.

13/06/2017