MKUU WA WILAYA AKEMEA UHALIFU

Posted on: November 2nd, 2022

Mkuu wa Wilaya ya Kwimba Mheshimiwa Johari Mussa Samizi  amekemea  tabia  ya baadhi ya  vijana wa Kijiji cha Shilembo  kufanya matukio  ya kihalifu ikiwemo kufunga barabara, kugombana, kuharibu  miundombinu ya anwani za makazi na  miundombinu mingine kwa kisingizio cha ulevi ( kulewa).

Ameyasema hayo  leo tarehe 2,Novemba 2022 katika mkutano  na Wananchi wa kijiji cha Shilembo uliofanyika katika Shule ya Msingi Mwamakelemo.

“ asiyefunzwa na mamaye hufunzwa na ulimwengu, ulimwengu ni Wananchi wote, hao vijana tutawafunza kwa kuwachukulia hatua hatuwezi kufumbia macho uhalibifu wa miundombinu  ambayo Serikali imetoa fedha nyingi kuitengeneza” amesema Samizi

Katika mkutano  huo viongozi wa Kijiji wametakiwa kuhakikisha  wanafanya kazi kwa kuzingatia sheria, taratibu na kanuni za uongozi vilevile  viongozi wametakiwa kusoma mapato na matumizi ya kijiji kila wanapofanya mikutano.

Aidha Mkuu wa Wilaya amewataka viongozi wa ulinzi shirikishi (Sungusungu ) kuendelea kufanya kazi na kusimamia ulinzi na usalama katika maeneo yao kwa kuzingatia taratibu walizojiwekekea.

Vilevile Wananchi wameshauriwa kuhakikisha wanapata lishe bora hasa kwa watoto chini ya miaka mitano ili kuhakikisha usalama wa Afya zao na kuwakinga na utapiamlo.