Mradi wa "Zijue Haki Zako Mtu Mwenye Ulemavu" Kutoa Mafunzo Wilayani Kwimba

Posted on: September 29th, 2017

Mradi wa “ Zitambue Haki Zako Mtu Mwenye Ulemavu” unaotekelezwa na asasi isiyokuwa ya kiserikali   The Foundation For Civil Society (FCS) kwa kushirikiana na  Chama cha Walemavu Tanzania (CHAWATA) –Wilayani Kwimba umetoa mafunzo kwa  Wananchi, Walemavu, na Viongozi wa Serikali ngazi ya kijiji ya  Ufuatiliaji wa mgawanyo wa Ruzuku Kwa watu wenye Ulemavu Katika vituo vya Afya, Zahanati na Hospitali ya Wilaya ya Kwimba.

Mafunzo hayo yalianza tarehe 25 Septemba, 2017 katika kata za Igongwa, Fukalo, Ngudu, Nkalalo na kumalizika katika kata ya Ngula tarehe 29 Septemba, 2017.

Naye Mwenyekiti wa Chama cha Walemavu Wilayani Kwimba Ndg Nyerere Julias Musa alisema walemavu wana haki ya kuzijua na kuzitambua haki zao, aliendelea kusema kuwa mafunzo hayo yamewapa fursa ya kupata nguvu ya kudai haki zao.

 Mwenyekiti wa Chama cha Wlemavu Kwimba Ndg Nyerere Julias Musa akitoa Mada wakati wa Mafunzo .

Ndg Nyerere alimshukuru Mkurugenzi Mtendaji wa Halmashauri ya Kwimba  Bibi Pendo Malabeja kwa kupokea andiko lao la Mradi pamoja na  kuwapatia ushauri wa hali na mali katika kutekeleza majukumu yao. 

Diwani wa Kata ya Nkalalo Mhe. Enos James Ntwale aliiasa jamii kwa kuacha  tabia ya kuwaficha  watu wenye Ulemavu Majumbani kwani Mradi upo kwa ajili ya kuwasaidia watu wenye matatio kama hayo. Aliyasema hayo wakati wa mafunzo katika kijiji cha Mwadubi.

Diwani wa Kata ya Nkalalo Mhe. Enos James Ntwale akiongea na wajumbe wa Mafunzo

Mratibu wa Shirika lisilo la Kiserikali MNGON (Umoja wa NGO’S katika mkoa wa Mwanza Ndg Adam Ndokeji aliiomba kamati ya  Ufuatiliaji wa Mgawanyo wa Ruzuku  kwa Watu Wenye  Ulemavu kuhakikisha wanaandika taarifa vizuri zisizopotosha jamii.

Aidha mjumbe wa kamati ya Mfumo wa Ufuatiliaji wa Matumizi ya Fedha za Umma ujulikanao kwa kiingereza Public Expenditure Tracking System (PETS) Ndg  Majingu Bugumba Misongoma ameiomba Serikali kutenga fedha  kwa watu wenye ulemavu kupitia bageti kwa ajili ya kupata huduma za Afya kwa sababu kundi hilo linamahitaji maalum.  

 Ndg  Majingu Bugumba Misongoma akiuliza swali wakati wa mafunzo

Chama cha Walemavu Tanzania (CHAWATA)-wilayani Kwimba kilianza mwaka  1961  kikiwa na malengo ya kuwaunganisha watu wenye ulemavu wa viungo ili waweze kudai haki zao kwa pamoja na kuleta maendeleo ya chama  chao wilayani kwimba.