MSIMAMIZI WA UCHAGUZI ATOA MAELEZO YA UCHAGUZI KWA WADAU WA UCHAGUZI

Posted on: September 26th, 2024

Msimamizi wa Uchaguzi  wa Halmashauri ya Wilaya ya Kwimba  Dkt. Amon Mkoga  ametoa maelezo na taratibu za uchaguzi wa Serikali za mitaa unaotarajia kufanyika Novemba 27,2024. 

Tangazo hilo limetolewa leo 26,Septemba 2024 kwa wadau wa uchaguzi ambapo watu wa makundi mbalimbali wameshiriki mkutano huo ikiwa ni pamoja na viongozi wa vyama vya siasa vya ACT, CUF, CHADEMA na CCM.

Wadau wengine walioshiriki ni viongozi wa dini, wazee maarufu, watumishi wa umma na wananchi wengine wote waliofika ukumbi wa Halmashauri.

Akitoa tangazo hilo Dkt Mkoga amesema shughuli za Uchaguzi wa Serikali za mitaa zimeanza rasmi ambapo matukio mbalimbali  yatafanyika kwa mujibu wa taratibu na sheria za uchaguzi zinazoongoza uchaguzi huo.

Amesisitiza kuzingatia ratiba ya matukio ya uchaguzi ambapo matukio muhimu yameelezwa yakiwemo tarehe 11-20 Oktoba,2024 ni siku za kujiandikisha kwenye daftari la mkazi, tarehe 25 oktoba 2024 ni siku ya kukoma uongozi kwa viongozi  walioko madarakani kwa sasa na matukio mengine yote yameelezwa.

Aidha msimamizi wa uchaguzi ametoa rai kwa wananchi wa Kwimba kujitokeza kushiriki matukio yote ya Uchaguzi na kuhakikisha wanashiriki siku ya uchaguzi kuchagua viongozi watakaohamasisha maendeleo ya vijiji vyao.

Uchaguzi wa Serikali za mitaa utafanyika tarehe 27,Novemba  2024 ambapo wenyeviti wa vijiji,wajumbe wa Serikali ya kijiji  na viongozi wote wa vijiji na vitongoji watachaguliwa.