RC. GABRIEL AZINDUA KLINIKI YA MACHO KWIMBA

Posted on: July 29th, 2021

Mkuu wa Mkoa wa Mwanza Mhandisi Robert Gabriel azindua Kliniki ya Macho ambayo mpaka kukamilika kwa jengo hilo milioni 55 zimetumika huku vifaa vya Kliniki hiyo vikighalimu milioni 115.4 zote zikiwa ni fedha za wafadhili.

Akiongea katika hafla hiyo Mhandisi Gabriel amemshukuru Dakitari Roshanali Nasser kwa kuona umuhimu wa kutoa fedha zake kununua vifaa vya Kliniki ya macho "amefanya jambo kubwa la kiimani,tumepokea kwa furaha kwa unyenyekevu na kwa heshima kubwa mchango aliotoa, alichokifanya ni somo kubwa kwa wana Kwimba kwani Dakitari huyu alizaliwa Wilayani Kwimba japo anaishi Marekani" amesema Mhandisi Gabriel.

Aidha Mkuu wa Mkoa ametoa wito kwa wana Mwanza na wana Kwimba kuiga mfano wa Nasser  wa kukumbuka Nyumbani kwa kufanya vitu vinavyosaidia jamii kwa ujumla,pia amewataka wananchi kujitokeza kupata huduma za macho kwani kuwepo kwa kituo hicho kutasaidia kupunguza ghalama na umbali wa kufauata huduma za Macho.

Mhandisi Gabriel amewaagiza viongozi wa Wilaya ya Kwimba kuhakikisha ulinzi na usalama wa vifaa vya Kliniki hiyo vinatunzwa katika Mazingira mazuri ili vitumike kwa lengo lililokusudiwa na wafadhili, amesisitiza kuwa watakaogundulika kutumia vibaya Kliniki hiyo hatua kali zitachukuliwa dhidi yao.