WAFANYABIASHARA WASHAURIWA KUANZISHA VIWANDA ILI KUINUA UCHUMI NA KUONGEZA AJIRA KWA VIJANA

Posted on: September 1st, 2021

Mwenyekiti wa Baraza la biashara ambaye ni Mkuu wa Wilaya ya Kwimba Mhe. Johari Mussa Samizi amewashauri wafanya biashara wa Wilaya hii kuanzisha viwanda vya kusindika na kutengeneza vitu mbalimbali vitakavyochochea maendeleo katika Wilaya ya Kwimba.  Haya yamejitokeza kwenye mkutano wa baraza la biashara uliofanyika tarehe 31,Agosti 2021 kwenye ukumbi wa Halmashauri ya Wilaya ya Kwimba.

Katika baraza hilo Daktari Farid Saleh amewashauri wafanyabiashara  kuanzisha kiwanda cha kutengeneza dripu  kwaajili ya matumizi ya Hospitali, zahanati na Vituo vya Afya ameshauri kuwa endapo vifaa vitapatika Wilayani itapunguza gharama za kuvisafirisha kutoka mbali, pia itachagiza maendeleo  kwani vijana wengi watapata ajira katika viwanda hibyo.Amesisitiza kuwa mfanyabiashara atakayeanzisha kiwanda hicho atapewa ushirikiano wa kitaalamu na Wataalam wa Afya.

Aidha Meneja wa TRA  Ndug. Mihayo K.Mitili ametoa elimu kuhusu kodi ya majengo inayokatwa kupitia LUKU Tanesco. Amesema wamiliki  wa nyumba zenye mita zaidi ya moja wafike ofisi za TRA hapo watapewa fomu za kujaza zitakazoonyesha mita ipi itumike kulipia kodi ya jengo kati ya hizo mita zote endapo wamiliki hawatajaza fomu hizo mita zote zitakatwa kodi ya jengo. Meneja ameshauri wananchi kufika ofisini kwake ili kupa maelekezo zaidi kuhusu kodi za majengo.

Baraza hilo limehudhuliwa na kiongozi wa stesheni   (Station Master) wa Bukwimba Nkalalo Ndug. Omari Simwanga, yeye amewashauri wafanyabiashara kujenga majengo ya biashara na nyumba za wageni pale Nkalalo kwani reli ya kisasa (SGR)  itakapokamilika eneo hilo litakuwa na watu wengi ambao watahitaji huduma za hoteli,nyumba za kupanga, huduma za kifedha( benki), usafiri na mahitaji mengine mengi hivyo amewasihi wafanyabiashara kuiona hiyo kama fursa kwao ya kwenda kuwekeza Nkalalo.