WATENDAJI WASHAURIWA KUACHA KUFANYA KAZI KWA MAZOEA

Posted on: September 10th, 2021

Mkurugenzi Mtendaji wa Halmashauri ya Wilaya ya Kwimba Bi. Happiness Joachim Msanga amewataka Watendaji wa Kata na Vijiji kurudi kwenye msitari ili kufanya kazi kulingana na taratibu, kanuni, sheria na miongozo ya utumishi. Ameyasema haya kwenye kikao kilicholenga Mkurugenzi  huyo kujitambulisha kwa Watendaji na kukumbushana taratibu na miongozo ya kazi, kilichofanyika tarehe 09,Sept 2021 katika Ukumbi wa Shule ya Sekondari Ngudu.

Bi. Happiness amewapongeza Watendaji wote wanaotekeleza majukumu yao kwa mujibu wa taratibu, sheria na kanuni za utumishi wa Umma kisha akawaasa wale wanaofanya kazi kwa mazoea kuacha  haraka tabia hiyo.  

Aidha amewasisitiza uwajibikaji, kushirikiana, upendo, uadilifu na usimamizi mzuri wa miradi inayotekelezwa katika maeneo yao ya kazi pia amewataka kusimamia ukusanyaji wa mapato kwa uaminifu na kujiepusha na ubadhilifu wa aina yoyote ile

    "acheni kufanya kazi kwa mazoea, sitakubali ubadhilifu nikakuchekea nitawachukulia hatua wale wote watakaotaka kwenda kinyume na utaratibu" amesema Bi.Happiness

 Kikao hicho kimehudhuliwa na  Mwenyekiti wa Halmashauri ya Wilaya ya Kwimba Mhe. Theleza Lusangija ambapo  amewashauri watendaji  kusimamia miradi inayotekelezwa katika maeneo yao ya kazi ili inapokamilika iendane na thamani ya fedha zilizotumika  pia amewashauri kufanyakazi kwa upendo na ushirikiano.

Katika kikao hicho Watendaji wa Kata na Vijiji wameomba kupewa motisha pale wanapofanya kazi vizuri, hasa wanapotimiza malengo waliyojiwekea katika mpango kazi wao wa kila mwaka.