WATENDAJI WATAKIWA KUHAMASISHA UJENZI WA VYOO BORA

Posted on: July 12th, 2024

Mkuu wa Wilaya ya Kwimba Mhe. Ng'wilabuzu Ludigija amewataka watendaji wa Kata kuwahamasisha wananchi  kujenga vyoo bora.

Ameyasema hayo leo Julai 12,2024 wakati wa kikao cha tathmini ya lishe cha robo mwaka " kafanyeni ufatiliaji na muwe wakali familia ambazo hazijajenga vyoo zichukulieni hatua, hakikisheni kila familia  inakuwa na choo bora ili tuepuke magonjwa" 

Mheshimiwa  Ludigija  amewasisitiza watendaji kuwatumia wahudumu wa Afya ngazi ya jamii kutoa elimu ya uzazi wa mpango na unyonyeshaji salama ili kuwakinga watoto na utapiamlo

" toeni elimu kwa wananchi, pia watumieni wahudumu wa afya ngazi ya jamii kufikisha elimu ya afya,  unyonyeshaji  na uzazi wa mpango"

Aidha  amewataka watendaji kushirikisha jamii katika mambo ya maendeleo kama kushiriki ujenzi wa vyoo vya shule na miradi mingine.

Akiwasilisha taarifa ya lishe ya robo mwaka mratibu wa Lishe Emma Kalolo amesema elimu ya lishe bora  inaendelea kutolewa kwa wananchi hali iliyopelekea idadi ya watoto wagonjwa wa utapiamlo kupungua kutoka wagonjwa 228  hadi wagonjwa 176 kwa mwaka

Naye Mkurugenzi Mtendaji wa Halmashauri ya Wilaya ya Kwimba Bi. Happiness Msanga  amewasisitiza watendaji  kuitumia siku ya lishe ya kijiji kuwaelimisha wananchi umuhimu wa lishe bora na madhara ya utapiamlo.