Watoa huduma watakiwa kuzingatia mafunzo ya mifumo ya kielektronikia

Posted on: March 19th, 2018

Kaimu Mkurugenzi Mtendaji wa Halmashauri ya Wilaya Kwimba Ndg Stamili  Ndaro amewataka watoa huduma ngazi ya vituo vya kutolea huduma za afya kushiririki mafunzo ya mifumo ya  Kielektronikia kwa umakini wa hali juu ili waweze kusimamia uzalishaji na  uhifadhi sahihi wa taarifa na takwimu   za afya pamoja na taarifa  sahihi za matumizi  ya fedha.

Ndg Ndaro ameyasema hayo wakati wa akifungua mafunzo ya siku sita yaliyowakutanisha wadau mbalimbali wakiwemo wawakirishi kutoka PS3 makao makuu Dar es salaam, PS3 Mkoa wa Mwanza, TAMISEMI na Wizara ya Afya,Maendeleo ya Jamii Jinsia, Wazee na Watoto  katika ukumbi wa Chama Cha Walimu (CWT) Ngudu tarehe 19 Machi, 2018.

Baadhi ya washiriki wa mafunzo ya kielektronikia ngazi ya kutolea huduma wakifanya mazoezi kwa vitendo baada ya maelekezo kutoka kwa wawezeshaji.

Akizungumza katika mafunzo hayo  Meneja wa Mradi PS3 Mkoa wa Mwanza Ndg  Perestian Masai amesema lengo la mafunzo hayo ni kuwajengea uwezo ili kuhakikisha kuwa vituo vya kutolea huduma kupitia fedha za ruzuku vinakuwa na mfumo maalum wa kuandaa taarifa za mapato na matumizi, hali ambayo itachangia uwajibikaji na utoaji wa huduma bora kwa wananchi.

Mwezeshaji wa mafunzo ya mifumo mipya kutoka chuo kikuu cha Dar es salaam Nd. Mwita Michael (katikati) akiwaelekeza baadhi ya washiriki namna ya uingizaji taarifa katika mfumo wa DHIS2. 

 Kwa upande wake DKT. Mtengwa D.M Kwa niaba ya Mganga mkuu wa Wilaya amesema mafunzo hayo yatasaidia kuhakikisha  watoa huduma katika vituo vya afya  wanapata ujuzi wa kutosha katika usimamizi wa fedha na kutoa huduma bora kwa wananchi.

Mafunzo hayo ya Kielektronikia ni pamoja na DHIS2 (mfumo wa utoaji taarifa za afya), GoTHoMISv3 (mfumo wa utoaji taarifa za ukusanyaji wa mapato ya hospital) na FFARS (mfumo wa uhasibu na utoaji taarifa za fedha) yanayotolewa na mradi wa Uimarishaji wa Mifumo ya Sekta za Umma (Public Sector System  Strengthening –PS3) kupitia  shirika la Maendeleo ya kimataifa la Marekani USAID.